Gjysmëdielli - libër i ri me poezi nga Sazan Goliku

GJYSMËDIELLI Libër i ri me poezi nga SAZAN GOLIKU

Sazan Goliku, autor i njohur për larminë krijuese në shumë gjini letrare dhe veprimtari të gjatë krijuese,  sapo ka dalë para lexuesve me librin e tij më ri me poezi “Gjysmëdielli” botuar nga “Emal”.  Ky është libri i njëmbëdhjetë me poezi i autorit. Në 134 faqet e librit paraqiten 107 poezi nga krijimtaria e viteve të fundit, ndarë këto në 7 kapituj: Përsiatje symbyllur, Ironi heroike, Perëndia e mjegullës, Ky numër nuk ekziston, Pas gjakut të derdhur, Fundjeta,Frymëzime. 

Karakteristike e poezive të Sazan Golikut është se ai motivet e veta poetike i qëmton brenda realitetit që e rrethon autorin, mjedisin shoqërore, në hapësirat ku lëviz dhe në shqetësimet qytetare. Padyshim është e vështirë që me pak fjalë të tregohet hapësira ku ai kërkon e mediton, gjen subjekte, situata apo karaktere e megjithatë përafërsisht mund të jepet një pamje e se tërës, poeti gërsheton realitetin qe e prek me dorë me nocione filozofike. Poezitë e tij kanë një taban të fortë jetësor ku ai kërkon e mediton, shpreh dëshira reale dhe utopike, nder këto vihen re edhe poezitë kushtuese për miqtë artistë që janë apo nuk janë më në këtë botë.  Kapur fort pas trungut mëmëdhetar, poezia e Sazan Golikut, krejt natyrshëm, bëhet pjesë e shpirtit njerëzor të kohës kur jetojmë.

 

Sfidë - poezi nga Sazan Goliku

 S F I D Ë

 

Nga Sazan Goliku

Mes një trafiku të çmendur

një plak i paplakur pedalon mbi biçikletë,

por më besoni, nuk është i lajthitur.

Përbuz vdekjen dhe ka frikë nga jeta e fjetur.

Një aksident vdekjeprurës është për të

një dhuratë nga një rrotë mbi rrota.

Një aksident uloklënës është për të – një mallkim.

Një plak i krisur pedalon mbi biçikletë,

Po nuk guxon ta kthej kokën as majtas as djathtas

me u kënaq duke parë trotuarëve

bukurinë e njomështinë e vajzave të reja.

Një plak sportiv pedalon mbi biçikletë dhe

as do t’ia dijë që zonja vdekje qëndron pas tij në zgarë

buzagaz.

Një plak skelet fluturon me biçikletë,

por askush nuk e vëren mespërmes brumbujve të makinave.

Është fantazma e së ardhmes.

9.12.2019

"Në kryqin e udhëkryqit"- një libër i ri poetik i Zyhdi Dervishit

 

“NË KRYQIN E UDHËKRYQIT” - NJË LIBËR I RI POETIK I ZYHDI DERVISHIT

Pas botimit të përmbledhjeve poetike: “Qiej të përthyer” (1999), “Jehonëlebetia” (20050, “Vetëklonimi i maskave” (2009), “Mokra e hijeve” (2014) Zyhdi Dervishi doli me librin e ri poetik “Në kryqin e udhëkryqit”.

Edhe në këtë përmbledhje poezia e tij karakterizohet nga fryma e theksuar sa qytetare aq dhe humane në çdo qelizë të saj.

Temat e motivet e poezive kapin një gamë të gjerë të problemeve të mprehta të realitetit të sotëm shqiptar dhe të përbotshëm, nëpërmjet perceptimit e konceptimit poetik, me figuracion të pasur  dhe emocionalitet të lartë. Shpirti kritik Dervishit prek me dhembje plagë të hapura të botës shqiptare.

Korrupsioni në të gjitha hallkat e shtetit, mosndëshkushmëria e shkelësve të ligjit, lufta e paskrupullt për pushtet, polarizimi i shoqërisë etj. pasqyrohen me vërtetësi e dramcitet të theksuar. Vargjet e këtij poeti kanë ngarkesa të shumta semantike dhe me rrezatime polivalente, ku figurat stilistike dhe mesazhet janë shkrirë organikisht.

Nga Sazan Goliku